Est 5 | KYG | STEP | Esata'a ne'ya'mo o'neno lole'e mago'e afina'mo mosino mai'neno kuvini kukenamo alino vaiteno'ae'mo uno kini vekamo lafi kegi'ya yu'ilagamo faleno haino kini vekamo aeno anagi male'neno fai mai'neno yagaino ne'apateya no'mo haopale'mo he tino mai'nigeno'ae'mo kini vekamo'mo no'afi'mo ne'yagaiya siate'mo fai mai'neno kumategamo aulu heno ageno mai'niye.

Esther 5

Esata'a kini vekae'mo afi ge'nige'ana Hemani'e'mo alopa ne'yate'mo e'na'a gemae

1 Esata'a ne'ya'mo o'neno lole'e mago'e afina'mo mosino mai'neno kuvini kukenamo alino vaiteno'ae'mo uno kini vekamo lafi kegi'ya yu'ilagamo faleno haino kini vekamo aeno anagi male'neno fai mai'neno yagaino ne'apateya no'mo haopale'mo he tino mai'nigeno'ae'mo kini vekamo'mo no'afi'mo ne'yagaiya siate'mo fai mai'neno kumategamo aulu heno ageno mai'niye. 2 Kini vekamo'a Esata'mo ageyana malaga mai'nigeno ageteno'ae'mo Esatafe'mo amuse huteno'ae'mo goli hayopa kayo'mo ali'niya aya'mo aeno hayo huteno alino ako'ya huno ateteno lekana pai'niye. Inagi Esata'a ageteno'ae'mo uno haopaleti'mo ani kayo'mo atupale'mo ayateti'mo ame ali'niye. 3 Kini vekamo'a huno'ae'mo, Kuvini a kanomo Esatao, Na agufa yafe'mo kahau'niye. Inagi kahau'nisiyana nagaemo ne'yagauva kopati'mo folagapati ali'na fako hu'na magokayaga ko'amo kamiguve. 4 Esata'a ge'ale'mo aeno atagaina huno ha paino'ae'mo, Kini vekae, Kahau'nisiyana Hemani'e'mo hemeni hani'ilagamo alopa yagita hu'na kate'nova ne'yate'mo e'ao, huno ha pai'niye. 5 Kini vekamo'a, Malage hutapa uta Hemani'mo avalelitapa egeno'ao kuvini'mo hau'niya kava'mo hino, huno hapa pai'niye. Inagi kini veka'e Hemani'e'mo Esata'a alopa yagita hu male'niyategamo u'na'age'apae'mo magokepi'mo fai'a mai'nae. 6 Nofi alagafati ani'mo ne'ne'apae'mo kini vekamo'a halate Esatafe'mo afi ge'niye. Na agufa yafe'mo kahau'nifigi naha paige'na kamino. Inagi kagaemo hukae'mo nagaemo muki yagai'na ne'apatova kopati'mo folagapati alika fako huka magokayaga'amo namiyo, huka hisana'mo'mo afa'a ali'na fako hu'na kamiguve. 7 Inagi Esata'a kini vekamo ge'ale'mo aeno atagaina huno ha pai'niye. Ge hu'na kafi gesuva gemo hane'niyana 8 amuse huka ne'natesanana muki yafe'mo kafi gesugekae'mo he kanalene, hukage'mo hugana'mofe'mo egamo mago'e hu'na lanakaitani ne'ya'mo Hemani'e'mo yagita hu'na lanategauvanagi e'ao. Nagaemo nahau'nisiya yafe'mo ani afinake'mo kaha paiguve.

Hemani'a Motekaife'mo naipeleti'mo aisugeno faligiye, huno hu male'niya gemae

9 Hemani'a ne'ya'mo neteno ataleno nelamino'ae'mo lusi kava huno amogaga aiteno aipamo'mo kanale hu'niye. Ne'uno'ae'mo ageyana Motekai'a kini vekamo yafa lafi kegi'ya kate kipate'mo itopale'mo mai'niyateti'mo he tino ape huteno ala agi'amo o'ami'nigeno'ae'mo Hemani'a lusi kava huno aipamo leno ate'niye. 10 Aipamo leno ate'niya'monanafa hau'niya kava'mo malage huno osuno afa ateno no'alegamo uno ava'yi huteno'ae'mo ao vaya'e a'amo Selesi'efe'mo ge hu'nige'a e'nae. 11 E'a mai'nageno'ae'mo agaemo huno'ae'mo, nagaemo asole moni'nimo malege asole mafa'ne'nimo ali'na apatege hu'na mai'nove. Kini vekamo'a ala agi'amo alino amiteno alopa ali'ya'mo ami'nige'apae'mo asole vaya'mo kini vekamo gamani vaya'a'e ali'ya'amo ne'aliya vaya'amogi'e'mo agae aiyafike'mo ne'maiya kavafe'mo ava gemo huno hapa pai'niye. 12 Mago'e gemo hapa paino'ae'mo, Kuvini a kanomo Esata'a alopa yagita huteno'ae'mo kini veka'e nagae'efeke'mo e'ao, huno ge hu'niye. Mago alu vaya'aife'mo ge osu'nifa la'agaefeke'mo ge hu'niyanageta'a egamo uta'a agae'e'mo halate ne'ya'mo negau'ae, huno hapa pai'niye. 13 Huno hapa pai'niya'monanafa Yu vekamo Motekai'a kini vekamo lafi kegi'ya kate kipate'mo itopale'mo mai'nige'na agete'nae'mo nagaemo nagesamo afuvana mani alagepa ya'mo ina agufa ya'mo hane'niye, huno hapa pai'niye. 14 Selesi'a Hemani a'amo'e muki ao vaya'mogi'e'mo, Afiyo, hu'a, mago vaya'aife'mo hapa paige'apao mago posi yosamo yatala'amo tuveti mitamo male'a agete'a ali'a fai'a ateyo. Ega netepi'mo uka kini vekae'mo afi gekae'mo, Motekai'mo lugo'afi'mo ane'mu aeka asaisanageno faligiye. Kagaemo ani kava hisanageno'ae'mo kaipamo'mo falu hu'nisigeka kamogaga aika kini veka'e'mo uka ne'ya'mo negane, hu'a ha pai'nae. Hemani'a ani gee'mo hau'nigeno vaya'aife'mo hapa pai'nige'a yatala posi yosamo ali'a fai'a ate'nae.